ABŞ Hərbi Hava Qüvvələri uzun illərdir xidmətdə olan B-52 bombardmançı təyyarələrinin gələcəyi ilə bağlı yeni araşdırmaya başlayır. Məqsəd mövcud donanmanın modernləşdirilməsinin kifayət edib-etməyəcəyini və ya tamamilə yeni ağır bombardmançı platformasına ehtiyac olub-olmadığını müəyyənləşdirməkdir.
Army.az xəbər verir ki, hazırda ABŞ ordusunun inventarında 76 ədəd B-52 Stratofortress mövcuddur.
Bu təyyarələrin sonuncusu 1962-ci ildə istehsal xəttindən çıxsa da, illər ərzində çoxsaylı yenilənmələrdən keçirilib. ABŞ Hərbi Hava Qüvvələri onları ən azı 2050-ci ilə qədər xidmətdə saxlamağı planlaşdırır. Bu halda ən “gənc” B-52-lərin yaşı 88-ə çatacaq.
2027-ci maliyyə ili üçün büdcə layihəsində ABŞ Hərbi Hava Qüvvələri “New Heavy Bomber Analysis of Alternatives” adlı yeni qiymətləndirmə proqramına 1 milyon dollar ayrılmasını istəyib. Araşdırma gələcək uzaqmənzilli zərbə tələblərini və B-52 donanmasının gələcək perspektivlərini müəyyənləşdirməyə yönələcək.
Sənədlərdə qeyd olunur ki, proqram çərçivəsində yeni nəsil ağır bombardmançı üçün texniki göstəricilər, əsas sistem parametrləri və mümkün istehsalçı variantları araşdırılacaq.
ABŞ ordusu paralel olaraq B-52 donanmasının genişmiqyaslı modernləşdirilməsini də davam etdirir. Proqram çərçivəsində təyyarələr yeni mühərriklər, radar sistemləri, rabitə avadanlıqları və müasir silahlarla təchiz ediləcək. Yenilənmələrdən sonra bombardmançıların B-52J adı ilə xidmətə davam etməsi planlaşdırılır.
Modernləşdirilən platformalara hipersəs raketləri və yeni nüvə silahlarının inteqrasiyası da nəzərdə tutulur. ABŞ ordusu bu təyyarələri həm uzaqmənzilli zərbə əməliyyatlarında, həm də ölkənin nüvə üçlüyünün əsas elementlərindən biri kimi istifadə etməyə davam edir.
