Rusiya Ukraynada məhdud ərazi irəliləyişləri müqabilində “ağır itkilər” verir və Qərbə qarşı diversiya fəaliyyətini, eləcə də kiberhücumları genişləndirir.
Army.az xəbər verir ki, bu barədə Danimarka Müdafiə Kəşfiyyat Xidmətinin (DDIS) hesabatında bildirilir.
Hesabata əsasən, müharibənin başlanmasından dörd ildən çox vaxt keçdikdən sonra Moskva hərbi məqsədlərinə çatmaq üçün daha yüksək risklərə gedir. DDIS Rusiyanın cəbhədəki fəaliyyətini eyni zamanda Qərbə qarşı hibrid fəaliyyətlərin intensivləşdirilməsi ilə əlaqələndirir.
Danimarka kəşfiyyatı Rusiyanın davranışına təsir edən amillər sırasında Ukraynanın Rusiya ərazisinin dərinliklərində kritik infrastruktur obyektlərinə endirdiyi zərbələri də qeyd edir. Ukrayna Prezidenti Volodimir Zelenskinin “uzaqmənzilli sanksiyalar” adlandırdığı bu hücumların Moskvanın addımlarına təsir göstərdiyi bildirilir.
Hesabatda Rusiya iqtisadiyyatının da ciddi təzyiq altında olduğu vurğulanır. DDIS bunu, əsasən, yüksək müdafiə xərcləri və beynəlxalq sanksiyalarla əlaqələndirir.
