Sosial şəbəkələrdə yayılan yeni görüntülər Mirage 2000-5F qırıcılarının Ukrayna Hərbi Hava Qüvvələrinin tərkibindəki fəaliyyətinə nadir baxış imkanı yaradıb.
Army.az xəbər verir ki, bu barədə “The Var Zona” məlumat yayıb.
Kadrlarda təyyarənin çox aşağı hündürlükdə uçduqdan sonra kəskin yüksəliş manevri etdiyi görünür. Hərbi müşahidəçilərin fikrincə, bu uçuş profili təkcə hava patrulu ilə deyil, həm də yerüstü hədəflərə qarşı zərbə əməliyyatları ilə əlaqəli ola bilər.
İndiyədək Mirage 2000-lərin əsasən Rusiya pilotsuz aparatları və qanadlı raketlərinə qarşı hava-hava missiyalarında istifadə edildiyi bildirilirdi. Lakin yeni görüntülər onların artıq hava-yer əməliyyatlarına da cəlb olunmağa başladığı ehtimalını gündəmə gətirib.
Mütəxəssislər qeyd edirlər ki, müşahidə olunan manevr xüsusilə AASM-250 Hammer sursatlarının tətbiqində istifadə edilən “toss bombing” taktikasına uyğun gəlir. Bununla belə, görüntülərdə silahın buraxılış anı əks olunmadığından, təyyarənin konkret döyüş tapşırığını dəqiq müəyyənləşdirmək mümkün deyil.
