“İranın raket hücumları “Epic Fury” əməliyyatının ilk günlərindən bu yana təxminən 90% azalmış ola bilər, lakin İran İslam İnqilabı Keşikçiləri Korpusu (SEPAH) tərəfindən qalan arsenalın hansı vəziyyətdə olduğu ilə bağlı suallar qalmaqdadır. SEPAH hələ də hücumlar həyata keçirir və onların bir çox ballistik raketləri inertial naviqasiya sistemləri və ya GPS kimi dəqiq yönləndirmə texnologiyalarından istifadə edir”.
Army.az xəbər verir ki, bunu “The National Interest”in köşə yazarı Kris Osborn deyib.
Onun sözlərinə görə, “Epic Fury” çərçivəsində İranda həyata keçirilən 13.000-dən çox hava hücumuna və raket anbarlarına ciddi ziyan vurulmasına baxmayaraq, SEPAH-ın hələ də hücum qabiliyyətini saxladığı görünür:
“Burada bir neçə əsas amil nəzərə alınmalıdır. Onlardan biri İranın strategiyası ola bilər. İranın yeraltı “raket şəhərləri” olduğu bilinir və burada kiçik qayıqlar, dronlar və raketlər saxlanılır. Bu obyektlərin hamısını ABŞ və İsrail qüvvələrinin dəqiq müəyyən etməsi çətindir.
İran onilliklərdir bu cür müharibə ssenarilərinə hazırlaşaraq arsenal yığıb. Sual budur: İranın əlində nə qədər raket qalıb? SEPAH uzunmüddətli müharibə üçün hücum qabiliyyətini qorumaq məqsədilə bilərəkdən ehtiyat saxlayırmı?
Əgər bu doğrudursa, bu strategiya qısa müddətdə üstünlük verə bilər. Lakin “Epic Fury” əməliyyatı İranın istehsal gücünü hədəf alıb və raket-dron istehsal obyektlərini məhv edib. Buna görə də İranın uzunmüddətli arsenal saxlama qabiliyyəti ciddi sual altındadır.
“İranın hələ də raketləri var”
Hazırda müxtəlif xəbərlərə görə ABŞ kəşfiyyat icmasının qiymətləndirməsi İranın hələ də kifayət qədər böyük silah arsenalına malik olduğunu göstərir. “New York Times” yazır ki, ABŞ kəşfiyyatı İranın “aldadıcı (decoy)” buraxılış qurğularından istifadə etdiyini və bunun ABŞ komandanlığının real raket sayını müəyyən etməsini çətinləşdirdiyini bildirir.
Digər hesabatlarda isə iranlıların zərbələrdən sonra dağıntılar arasından qazıntı apararaq yeraltı anbarları bərpa etməsi və buraxılış qurğularını yenidən qurması iddia olunur”.
