Rusiya “İskəndər” operativ-taktiki raket komplekslərinin imkanlarını artırmaq üçün onun raketlərini mütəmadi olaraq modernləşdirir.
Army.az-ın məlumatına görə, Ukrayna Hərbi Hava Qüvvələrinin ehtiyatda olan zabiti və müdafiə sənayesi müəssisəsinin inkişaf direktoru Anatoli Xrapçinski “UNIAN”a açıqlamasında bildirib ki, bu proses raketlərin hava hücumundan müdafiə sistemləri tərəfindən aşkarlanmasını və məhv edilməsini çətinləşdirməyə yönəlib.
Onun sözlərinə görə, Rusiyanın yaxın vaxtlarda “İskəndər” kompleksi üçün yeni ballistik raketlərdən istifadə edə biləcəyi barədə məlumatlar yayılıb. İddialara əsasən, modernləşdirilmiş raketlər aşağı hündürlükdə uçaraq radarların aşkarlanmasından yayınmaq, uçuş trayektoriyasını qeyri-müntəzəm şəkildə dəyişmək və əlavə aldadıcı vasitələrdən istifadə etmək imkanına malik olacaq.
Xrapçinski qeyd edib ki, Rusiya 2022-ci ildən bəri “İskəndər” raketlərini davamlı olaraq təkmilləşdirir. Onun sözlərinə görə, bu raketlərdə əvvəldən istilik tələləri və radioelektron mübarizə vasitələri mövcud olub, həmçinin uçuşun son mərhələsində hava hücumundan müdafiə sistemlərinin işini çətinləşdirən texnologiyalardan istifadə edilib.
