Birləşmiş Krallığın Kral Hərbi Hava Qüvvələrinə məxsus iki ədəd “Lockheed Martin F-35B” Lightning II döyüş təyyarəsinin təhvil uçuşu zamanı baş verən texniki nasazlıq səbəbilə təxminən iki aydır Atlantik okeanındakı Azor adalarında saxlanıldığı bildirilir.
Army.az xəbər verir ki, Böyük Britaniya Müdafiə Nazirliyi 2026-cı ilin martında müqavilə çərçivəsində sifariş edilən ümumilikdə 48 ədəd “Lockheed Martin F-35B” Lightning II təyyarəsinin təhvil prosesinin tamamlandığını açıqlamışdı.
Lakin son partiyaya daxil olan iki təyyarə texniki problem səbəbilə ölkəyə çata bilməyib. Məlumata görə, ABŞ-ın Texas ştatındakı Fort-Uort müəssisəsindən qalxan təyyarələr uçuş zamanı nasazlıqla üzləşib və daha sonra Azor adalarındakı “Lajes” beynəlxalq hava limanına məcburi eniş edib.
Eyni partiyadakı üç digər təyyarə ötən ay RAF Marham bazasına çatıb, problemli iki təyyarə isə hazırda texniki baxış və təmir prosesində saxlanılır.
Hadisə ilə bağlı nasazlığın detalları açıqlanmasa da, ekspertlər bunun F-35 proqramında uzun müddətdir müzakirə olunan texniki problemlər və ehtiyat hissələri ilə bağlı çətinlikləri yenidən gündəmə gətirdiyini bildirirlər.
