İran parlamentinin sədri Məhəmməd Bağır Qalibaf ABŞ-ı İslamabad qarşılıqlı anlaşma memorandumunun şərtlərinə əməl etməməkdə ittiham edib.
Army.az xəbər verir ki, o, bu barədə “X” sosial şəbəkəsində paylaşım edib.
Qalibaf Vaşinqtonun sənəd üzrə üzərinə götürdüyü öhdəlikləri pozduğunu bildirib:
“ABŞ-ın yol verdiyi əsas pozuntular arasında İran gəmilərinin Hörmüz boğazından sərbəst keçidinə maneələr yaradılması, hərbi əməliyyatların yenidən başlanacağı ilə bağlı davamlı təhdidlər, neft sektoruna qarşı sanksiyaların bərpası, İsrailin Livandakı əməliyyatlarını davam etdirməsi və İranın cənub ərazilərinə endirilən zərbələr var. Bu addımlar İslamabad memorandumunda əks olunan prinsiplər və öhdəliklərlə uzlaşmır. Qorxu və təzyiq siyasəti artıq keçmişdə qalıb. İranı şantaj yolu ilə geri çəkilməyə məcbur etmək mümkün olmayacaq”.
