Almaniya 53-cü “Airbus A400M Atlas” hərbi nəqliyyat təyyarəsini qəbul edərək bu tip üzrə bütün sifarişlərini tam şəkildə başa çatdırıb.
Army.az xəbər verir ki, bu barədə “German Ministry of Defence” məlumat yayıb.
Bildirilir ki, bu addım ölkənin strateji hava daşımaları imkanlarında mühüm mərhələ kimi dəyərləndirilir.
A400M proqramı çərçivəsində ən çox sifariş verən ölkə Almaniya olub. “Airbus” tərəfindən həyata keçirilən təhvil prosesi 2014-cü ildən başlayaraq mərhələli şəkildə icra olunub və indi tam yekunlaşıb.
Son təhvil ilə birlikdə şirkət Almaniya qarşısında götürdüyü bütün istehsal öhdəliklərini tamamlamış sayılır.
A400M təyyarələri Almaniya ordusunun köhnə “Transall C-160” nəqliyyat aviasiyasını əvəz edərək genişmiqyaslı modernləşmə təmin edib.
Yeni platforma daha uzaq məsafə qət etmə, daha böyük yük daşıma və müxtəlif missiyaları yerinə yetirmə qabiliyyəti ilə fərqlənir və ölkənin həm taktiki, həm də strateji daşımalarını gücləndirir.
Almaniya Hərbi Hava Qüvvələrində xidmət edən A400M-lər yalnız hərbi tapşırıqlarda deyil, həm də təbii fəlakətlərdən sonra, xüsusilə Karib bölgəsinə humanitar yardım daşınması kimi əməliyyatlarda fəal şəkildə istifadə olunub.
