Çin və Laos arasında hərbi əməkdaşlığın genişləndirilməsi çərçivəsində Vientyanın təxminən 50 kilometr şimalında yerləşən Ban Kun ərazisində iki yeni obyekt istifadəyə verilib.
Army.az xəbər verir ki, yeni infrastrukturun tərkibinə Çin-Laos Birgə Dəstək və Təlim Mərkəzi ilə Çin-Laos Dostluq Aviasiya Akademiyası daxildir.
Obyektlərin açılışında Laosun baş nazirinin müavini və müdafiə naziri Khamlieng Outhakayson, eləcə də Çin nümayəndə heyəti iştirak edib.
Layihənin Pekinin Cənub-Şərqi Asiyada hərbi təlim, logistika və əməliyyat imkanlarını genişləndirmək istiqamətində atdığı addımlardan biri olduğu bildirilir.
Yeni kompleksin yerləşdiyi Ban Kun ərazisi daha əvvəl ABŞ-ın hərbi məqsədlərlə istifadə etdiyi köhnə hava zolağının yaxınlığında yerləşir.
Çin və Laosun birgə həyata keçirdiyi layihənin əsas hissəsini uzunluğu təxminən 2 kilometr olan uçuş-enmə zolağı təşkil edir. Ərazidə həmçinin təyyarələrin hərəkəti üçün yollar, dayanacaqlar, anqarlar və digər yardımçı obyektlər inşa olunub.
