Rusiyanın raket və pilotsuz uçuş aparatlarını erkən aşkar etmək üçün istifadə etdiyi A-50U təyyarələrinin sayı kəskin azalıb. Hazırda Moskvanın istifadəyə yararlı vəziyyətdə cəmi bir neçə belə təyyarəyə malik olduğu bildirilir.
Army.az xəbər verir ki, bu barədə “Defence Blog” məlumat yayıb.
Nəşr yazır ki, Rusiya hava hücumundan müdafiə sisteminin mühüm hissəsi uzaqmənzilli radiolokasiya aşkarlama və idarəetmə təyyarələrindən ibarət məhdud A-50U parkına söykənir. Mövcud çatışmazlıq getdikcə daha ciddi problemə çevrilir. Rusiyanın itirdiyi təyyarələri qısa müddətdə yenidən istehsal etməsi isə mümkün deyil.
Müdafiə sənayesi üzrə tədqiqatçı Maykl Bonert A-50U-nu Rusiyanın hava hücumundan müdafiə şəbəkəsində müxtəlif sistemlərin fəaliyyətini əlaqələndirən “uçan kvotərbek” kimi xarakterizə edib.
Təyyarənin əsas üstünlüklərindən biri radar sisteminin yüksək hündürlükdə yerləşməsidir. Bu, A-50U-ya yerüstü radarlarla müqayisədə daha geniş ərazini müşahidə etmək imkanı verir.
Bonertin sözlərinə görə, yerüstü radarlar alçaqdan uçan hədəfləri adətən 16-32 kilometr məsafədən aşkar edə bilir. Daha sonra isə radio üfüqü belə hədəflərin görünməsinə mane olur.
A-50U-nun hava radarı isə analoji hədəfləri nəzəri olaraq 320 kilometrdən artıq məsafədən müəyyən edə bilər. Bu imkan Rusiya qüvvələrinə mümkün hücuma reaksiya vermək üçün əlavə vaxt qazandırır.
