Türkiyənin müdafiə sənayesi şirkəti ROKETSAN “SAHA Expo” sərgisində təqdim etdiyi yeni nəsil CİDA tank əleyhinə raket sistemi ilə bağlı açıqlama verib.
Army.az-ın xəbərinə görə, şirkət bildirir ki, NLOS (görmə xəttindən kənar) zərbə qabiliyyətinə malik bu sistem uzun məsafəli atış imkanları və müxtəlif platformalara inteqrasiya oluna bilməsi ilə müasir döyüş sahəsində yeni əməliyyat seqmenti formalaşdırmağı hədəfləyir.
ROKETSAN-ın baş direktoru Murat İkinci tərəfindən paylaşılan məlumatlara əsasən, CİDA sistemi klassik tank əleyhinə raketlərdən fərqli olaraq hədəfi birbaşa görmə tələb etməyən texnoloji quruluşa sahibdir.
Sistem məlumat ötürmə kanalları vasitəsilə raketin başlıq kamerasından əldə edilən görüntünü real vaxtda operatora çatdırır. Bu mexanizm “Man-in-the-Loop” prinsipi kimi tanınan “dövrədə insan” konsepsiyasına əsaslanır və uçuş zamanı hədəfin dəyişdirilməsi və yönləndirilməsi imkanını təmin edir.
Bu yanaşma bölmələrə qapalı və ya qorunan mövqelərdən yüksək dəqiqlikli zərbələr endirmək imkanı yaradır. Şirkətin təqdim etdiyi test nəticələrinə görə, CİDA sistemi hava-yer rejimində 55 km-dən, yer-yer rejimində isə 35 km-dən artıq məsafəyə qədər effektiv atış qabiliyyətinə malikdir.
