Fars körfəzinin zəngin ölkələri İranın hücumlarından və Hörmüz boğazının faktiki bağlanmasından sonra müharibə ilə sülh arasında qeyri-müəyyən vəziyyətə düşüblər. Bu durum iqtisadi bərpa perspektivlərini ciddi şəkildə təhdid edir.
Army.az xəbər verir ki, bu barədə “Agence France-Presse” məlumat verib.
Bildirilib ki, enerji infrastrukturuna zərər və danışıqların dayanması geniş miqyaslı qeyri-müəyyənlik yaradıb. Hətta kövrək atəşkəsə baxmayaraq, toqquşmaların yenidən başlaması riski qalır.
Qətər mayeləşdirilmiş qaz istehsalını dayandırıb, Küveyt və Bəhrəyin isə fövqəladə vəziyyət elan ediblər. Turizmin azalması, ticarət dövriyyəsinin zəifləməsi və əmək bazarına təzyiq böhranın əsas əlamətləri kimi göstərilir.
Analitiklər bildirirlər ki, bu vəziyyətin davam etməsi iqtisadi şaxələndirmə planlarına və regiondakı siyasi balanslara uzunmüddətli təsir göstərə bilər.
