Ukrayna Silahlı Qüvvələri 2026-cı ilin ilk dörd ayı ərzində əvvəlki ilin tam dövrü ilə müqayisədə iki dəfə çox dron-interseptor əldə edib.
Army.az xəbər verir ki, bu barədə Ukrayna Müdafiə Nazirliyi məlumat yayıb.
Bildirilir ki, təchizat Ukrayna Müdafiə Satınalmaları Agentliyi müqavilələri, “Dron Ordusu” proqramı və DOT-Chain Müdafiə platforması vasitəsilə həyata keçirilir.
Qurumun açıqlamasına görə, bu çoxkanallı sistem ordunun təminatını artırır və təchizatın sabitliyini təmin edir.
Müdafiə Nazirliyi bildirir ki, bu dronlar döyüş şəraitində effektivliyini sübut edib və Ukraynanın hava hücumundan müdafiə imkanlarını əhəmiyyətli dərəcədə gücləndirib. Eyni zamanda, onların istifadəsi raket əleyhinə sistemlərə düşən yükü azaldır və bu resursların daha çox Rusiyanın qanadlı və ballistik raketlərinə qarşı yönləndirilməsinə imkan verir.
Qeyd olunur ki, dron-interseptorlar həm daha ucuz başa gəlir, həm də düşmənin “Şahed” tipli pilotsuz aparatlarına qarşı daha səmərəli hesab olunur.
Müdafiə naziri Mixail Fedorov bildirib ki, mart ayında bu sistemlər rekord nəticə göstərərək 33 mindən çox müxtəlif tipli düşmən dronunu zərərsizləşdirib.
Nazir həmçinin qeyd edib ki, Ukraynada dronların uzaqdan idarəetmə texnologiyası genişləndirilir və bu, yüzlərlə, hətta minlərlə kilometr uzaqlıqdakı hədəflərin vurulmasına imkan yaradır. Bu istiqamətdə inkişaf proqramı “Brave1” çərçivəsində başlanılıb.
