Böyük Britaniya ABŞ istehsalı F-35A qırıcılarını NATO-nun ikili təyinatlı təyyarələr missiyasına daxil etməyi planlaşdırır. Bu addım ölkənin nüvə çəkindirmə imkanlarının hava platformaları ilə də genişləndirilməsi deməkdir.
Army.az xəbər verir ki, bu barədə “Army Recognition” məlumat yayıb.
Britaniya Müdafiə Nazirliyinin 2026-cı il üzrə “Müdafiə Nüvə Müəssisəsi” hesabatında bu qərarın ölkənin NATO-nun nüvə əməliyyatlarına verdiyi töhfədə mühüm dəyişiklik yaradacağı qeyd olunub.
Planın həyata keçirilməsi ilə F-35A qırıcıları Kral Hərbi Hava Qüvvələrinin nüvə missiyalarında istifadə oluna biləcək. Hazırda Britaniyanın nüvə çəkindirmə imkanları əsasən Kral Hərbi Dəniz Qüvvələrinin “Vanguard” sinifli sualtı qayıqları və “Trident II D5” ballistik raketlərinə əsaslanır.
Yeni yanaşmanın NATO-nun nüvə çəkindirmə imkanlarına hava və dəniz platformalarının paralel şəkildə cəlb olunması baxımından əlavə çeviklik qazandıracağı bildirilir.
London 2025-ci ilin iyununda ən azı 12 ədəd F-35A almaq və bu qırıcıları NATO-nun nüvə missiyasına cəlb etmək niyyətini açıqlamışdı. 2026-cı il üzrə parlament yeniləməsində isə layihənin Böyük Britaniyanın daha geniş nüvə modernləşdirmə proqramının tərkib hissəsi olaraq qaldığı təsdiqlənib.
Məlumata görə, qırıcılar təhvil verildikdən sonra Kral Hərbi Hava Qüvvələrinin NATO çərçivəsində ikili təyinatlı təyyarələr missiyasına qoşulması nəzərdə tutulur.
