ABŞ və İran arasında mümkün razılaşma Rusiyanın geosiyasi və iqtisadi mövqelərinə ciddi təsir göstərə bilər.
Army.az xəbər verir ki, bu barədə “Newsweek” məlumat yayıb.
Məqalədə qeyd olunur ki, əgər əldə olunacaq anlaşma Hörmüz boğazında gərginliyin azalmasına və dəniz nəqliyyatının bərpasına gətirib çıxarsa, Moskva qlobal enerji bazarlarında mövcud böhranlardan əldə etdiyi bir sıra təsir rıçaqlarını itirə bilər.
Analitiklərin fikrincə, Yaxın Şərqdəki indiki gərginlik Rusiyanın neft ixracatçısı kimi rolunu gücləndirir və enerji sektoruna əlavə gəlir qazandırır. Lakin vəziyyətin sabitləşməsi neft qiymətlərində risk premiumunu azaldaraq Rusiya şirkətlərinin qazancını aşağı sala bilər.
Eyni zamanda vurğulanır ki, İrana dair konfliktin yumşalması Qərbin Rusiyaya qarşı iqtisadi təzyiq imkanlarını genişləndirə, o cümlədən sanksiyaların sərtləşdirilməsi və “kölgə donanması” üzərində nəzarətin artırılması üçün şərait yarada bilər.
Məqalədə ayrıca qeyd olunur ki, münaqişələrin “dondurulması və sonra danışıqlarla tənzimlənməsi” modeli gələcəkdə digər geosiyasi proseslər üçün presedent yarada bilər.
Ümumi nəticəyə görə, Körfəz regionunda sabitlik Rusiyanın enerji gəlirlərini azalda, eyni zamanda Qərbin Moskva üzərində iqtisadi və hərbi təzyiq imkanlarını gücləndirə bilər.
