İranın İsrail ilə qarşıdurmada verdiyi itkilərdən sonra regionda təzyiqi artırmaq üçün Yəməndəki husilərdən və İraqdakı silahlı qruplardan istifadə etdiyi bildirilir. Bu qüvvələrin əsas hədəfləri arasında Səudiyyə Ərəbistanı və ABŞ-ın Körfəz regionundakı digər müttəfiqləri göstərilir.
Army.az xəbər verir ki, bu barədə Associated Press (AP) məlumat yayıb.
Bildirilib ki, son günlər Səudiyyə Ərəbistanına qarşı həyata keçirilən hücumlar Yəmən və İraqdakı İranla əlaqəli qruplar arasında əməkdaşlığın gücləndiyini göstərir.
Səudiyyə və İraq rəsmilərinin agentliyə verdiyi məlumata əsasən, husilərin nümayəndələri İraqdakı silahlı qruplarla görüşlər keçirib. Bildirilir ki, bu təmaslar Səudiyyənin neft obyektlərinə son iki gün ərzində təşkil olunan dron hücumlarının hazırlanması və həyata keçirilməsində koordinasiyanın təmin edilməsinə xidmət edib.
Husilərin son dövrdə Səudiyyə Ərəbistanının enerji infrastrukturu və neft ixracı ilə bağlı marşrutlarına qarşı hücumları artırdığı qeyd olunur. AP-nin məlumatına görə, “Ənsarallah” iyulun sonundan etibarən Səudiyyənin neft obyektləri və tankerlərinə qarşı 12-dən çox hücum həyata keçirib.
